هاميلاردان آرتيق، آي دوْست! سن ايله چوخ الفتيم وار
نه قدهر كي، پخمهسن سن، سنه چوخ ارادتيم وار!
نه قدهر جيبينده پول وار، سني ايستهرم اورهكدن
اتگيندن اوزومهرم ال، كسهلر اگر بيلكدن
نئجه ال چكيم سنين تك بئله ساده بير دبكدن؟
عزيزيم! اؤزوندن آرتيق، جيبينه محبتيم وار
نه قدهر كي پخمهسن سن، سنه چوخ ارادتيم وار!
سئوهرم هميشه، دوستوم! اولا پئيسرين مكانيم
سني موفته ايشلهدم من، نه قدهر كي، واردي جانيم
دوزهسن اگر ساعاتدا دَيه مين تومن زيانيم
ائدهسن فقط تحمل نهقدهر كي، زحمتيم وار
نهقدهر كي، پخمهسن سن، سنه چوخ ارادتيم وار
منه جان- جيگرسن، اوغلان! سنه ياخشي يولداشام من
دئييرم: سن اؤل! اينان كي، نه صفالي قارداشام من
قازانيزدا آش اولان وقت، سيزين ائوده لاپ باشام من
بونوجدي سؤيلهديم من، دئمه كي، ظرافتيم وار
نه قدهر كي، پخمهسن سن، سنه چوخ ارادتيم وار!
سئويرم كي، آرتاسنده داها گون- به گون حماقت
ائلهيم هميشه، هر گون سيزين ائوده من اقامت
بئله بير ايش اولسا، دوستام سنه بنده تا قيامت
لال اولوم يالان دانيشسام، بو سئوزه صداقتيم وار
نه قدهر كي، پخمهسن سن، سنه چوخ ارادتيم وار!
من اولوم! بئلنچي خام قال، اؤلنه قدهر اويانما
اوزونه گولوب، باشيندان گوتورنده بوركو، قانما
سنه واردير اركيم، «آرش»! مني مرد رند سانما
جيبيني كسيم، ولي سن، بئله بيل شرافتيم وار
هاميلاردان آرتيق، آي دوست! سنه ايله چوخ الفتيم وار
نه قدهر كي پخمهسن سن، سنه چوخ ارادتيم وار!
شعر ملمع قاچ چاي- قند آل! شعر طنز حمید آرش آزاد...
ما را در سایت شعر ملمع قاچ چاي- قند آل! شعر طنز حمید آرش آزاد دنبال می کنید
برچسب : نویسنده : arashazad بازدید : 168 تاريخ : جمعه 7 تير 1398 ساعت: 14:52