حسرت تزه لندي شعر طنز حمید آرش آزاد

شكر آللاها، ياز گلدي، طبيعت تزه لندي

داغ- داش دا اولان حسن و طراوت تزه لندي

ائل، بير- بيري نين ائولرينه حمله گتيردي

بايرام گوروشو اولدو، زيارت تزه لندي

آجيل تالانيب، مئيوه لرين باغري سوكولدو

هر بير ائوه گئتديكده بو غارت تزه لندي

بدبخت آتانين وار- يوخو بايرامليغا گئتدي

پول سوز- پاراسيز قالدي، مصيبت تزه لندي

بيچاره ني اوغلان دا سويوبدور، كوره كن ده

هم قيزلا گلين گلدي، رقابت تزه لندي

دوست- آشنا قوجاقلاشدي، اوپوش ياغدي ياغيش تك

اوزلرده ماتيك رنگي، رطوبت تزه لندي

ارزش له اصول، اولدولار البته رعايت

اخلاق قورونوب، هم ده كي سنت تزه لندي

سيزده گونونه آد قويولوب "روز طبيعت"

ائل بس كي زيبيل توكدو، طبيعت تزه لندي

چول لرده، چمن لرده دويون لندي گويه رتي

ار تاپماغا بير دفعه ده نيت تزه لندي

اوچ- دورد آغاجا ووردو دويون ائوده قالان قيز

ووردوقجادا، قلبينده كي حسرت تزه لندي

بعضاً ده چاليب- اويناماغا قالخدي اوشاقلار

باخجاق، قوجا كونلونده ده رغبت تزه لندي

آنجاق يادينا دوشدو، دئميشلركي: "ياغار قار…"

دوشجك يادا قار، سينه ده وحشت تزه لندي

تك باشچي لارين سازلارينا اوينادي "آرش"

بئل آرتروزا دوشدو، اذيت تزه لندي