سس‌لر...، نه سس‌لر؟! شعر طنز حمید آرش آزاد

صبح اوْلدو، هر طرف‌دن اوجالدي دوكان سسي

خيردا چؤره‌ك آلان سسي، شلغم ساتان سسي

گوپ- گوپ گورولدايير گئنه يوزلر بلندگو

هر بير وانئت وئرير بئش- اوْن- ايرمي دوكان سسي

ائوده قادين ياتيب، سماوار ايشله‌مير هله

گلسه گون اوْرتا، قوْوزاناجاق استكان سسي

يوْخسول ائوينده عشق لال اوْلموش، سسي باتيب

آنجاق سكوت دا يوْخ‌دور، اوجالميش يامان سسي

گئت، بير قولاق ياتيرت خياوان لاردا آرخ‌لارا

يوْخ سو شيريلتي سي، گلير هردم سيچان سسي

بير سئچگي وار قاباق دا، هله آلتي آي قالير

عرشه چاتيب شعار سسي، وعده، چاخان سسي

«نفت دن ساواي» آدي ايله، اوْلوب صادر هر زاديم

قالخير ياواش- ياواش بو ياماقلي تومان سسي

بير جور عجيبه نعره‌لي خواننده‌لر گليب

خوْش‌دور اوْلاردان انكرالاصوات، قابان سسي

«شهريّه»- نين گله‌نده آدي، تيتره‌يه اوشاق

آغلار، دئيه‌ر: «آنا! گئنه گلدي خوْخان سسي»

ائولنمه‌يين گلير آدي، يوْخ تار- قاوال سؤزو

وام صحبتي وار اوْرتادا، هم هفتخوان سسي

«آرش» قوْجالسادا، هله طبعي جوان قاليب

سؤزده باهار تؤره‌لدير اوْ، وئرمز خزان سسي