نوْلايدي، نؤوروز عمي! سنده بوْللو رحمت اوْلايدي؟
بشرلره، داهادا سنده چوْخ محبّت اوْلايدي
«نوْئل بابا» وئرير هديه، سئوينديرير هامي خلقي
كاش اوْنجا، اؤز ائلينه، سندهده كرامت اوْلايدي
«اقليت»دير اوْ، «اهلِ كتاب»دير، همده كي «غربي»
ولي كاش اوْنجا فقط سنده بير لياقت اوْلايدي
اوْنون كيمي گئديب، اوْغلان! نهدن «كتاب» اوْخومورسان؟
نوْلايدي سنده بير آز علمه، درسه رغبت اوْلايدي؟
«پيامِ نور»دا، يا «آزاد»دا، آزجا درس اوْخويايدين
«ليسانس» آلاندا، بئكارليق سنه مصيبت اوْلايدي!
آلايدين، اوْندا بو يوْل مسندين «وزارت» اوْلايدي
گئدهيدين، «اوستاد» اوْلايدين همان او مدرك الينده
ايشينده چيخسا ايگي، مين رقم حمايت اوْلايدي
كئچهك بو سؤزدن هله، عرض ائديرديم: آي عمي نؤوروز!
نوْلايدي سنده بير آز يوْخسولا محبت اوْلايدي؟
اوْلوبدو هر دنهسي پوستهنين، يوزاللي تومن- زاد
كاش آجيله- زادا، بير عادلانه قيمت اوْلايدي
گلهنده نفت پولو سوفرايا، دوْلا كاسا- بوْشقاب
بير آزجا شيرينيده- آجيلده اوْنلا دعوت اوْلايدي
بئش- آلتي دستده پالتار گئيهيدي آرواد- اوشاقلار
«تاناكورا»، يادا كي، ترس- آواند قسمت اوْلايدي
واريمدير آلتي «سين» ائوده، اينانماسان، گل، اؤزون گؤر
اوْلايدي كاش بيريده، «يئدديسين» رعايت اوْلايدي
«سارا»، «سُميّه» «ساناز»، همده «سوسن» ائوده قاليبلار
«سمر»ده وار، «سوْنا»دا، كاش «سوماق» كفايت اوْلايدي!
بو آلتي تورشاميش، اوْددان- سودان هر ايل آتيليرلار
نولايدي بخت آچيلايدي، بولاردا راحت اوْلايدي؟
بو «اقتصادي تحول» هاياندا قالميش، الهي؟
گلهيدي، يوْخسول ايشي اوْندا عيش- عشرت اوْلايدي
«سوبسيد»- يميزاوْلايدي نقدي، پول ياغايدي ياغيش تك
قيزيل- گوموشدن اوْ گون يوْخسولا عمارت اوْلايدي!
ايناندين هر شُعارا- وعدهيه، سفئهلهدين «آرش»!
كاش آزجا سنده عاغيل، منده چوْخلو ثروت اوْلايدي
شعر ملمع قاچ چاي- قند آل! شعر طنز حمید آرش آزاد...
ما را در سایت شعر ملمع قاچ چاي- قند آل! شعر طنز حمید آرش آزاد دنبال می کنید
برچسب : نویسنده : arashazad بازدید : 140 تاريخ : شنبه 17 فروردين 1398 ساعت: 16:56