يئددي سين؟!.......... شعر طنز حمید آرش آزاد

اي صبا! تئزجه ايمئيل ايله خبر وئر او يارا

شكر اولا آللاها، قيش چيخدي، يئيشديك باهارا

سوفرادا يوخدور اگر بير نئچه " سين" غصه سي يوخ

يئرينه، يئديي " سين" ائوده اوتورب هاردان- هارا!

سكينه، ساميه، سلطان باجي، سئودا، سريه

قاليب ائوده، قوجاليبلار، داها سيمين له سارا

ار تاپيلمير بولارا، ايش ده كي يوخ جامعه ده

ايش لري تكجه سوماق سورماق اولوب شام- ناهارا

يئددي " سين" ايسته ميرم، يئددي جه كوپ سركه وئرين

تورشاميش قيزلارا بير چاره قيليم من بئچارا

بير نفر رحم ائله ييب، ائلچي گله قيزلاريما

حاضرم من جانيمي اوچ دونه چيرپام ديوارا

كوچوب اوغلان لاريميز، هر بيري بير اولكه ده دير

پول- چورك آرديجا اولموش نئچه ميليون آوارا

" نخبه" دير، هم ده آليب شيمي، فيزيك دكتراسي

غرب ده گارسون اولوب، ساعتي اوچ- دورد دولارا

ولي يوخ غصه يئري، گر كوچوب اوغلان لاريميز

گئنه افغانلي بيزي نايل ائديب افتخارا

ياخشي بير مشتري دير قيزلارا افغانلي جوان

مشهده، تهرانا باخ، گور نئجه چيخميش بازارا

دوز دو وار خيرداجا بير عيبي بو افغانلي لارين

فرق قويمازلار اولار چوخ خانيم ايله داوا را

نئيله مك؟ چون كي " خودي"، هم بيزه " قارداش" ساييلير

نه اولور " موز" سئوله سك بيزده سارالميش خيارا؟!

گئنه چاشدين سوزونو، " آرش"! آمان دير، بس ائله

ساكت اگلش، داداشيم! چوخ دانيشيب، قويما بارا