بيزده بئله‌لريني سئوه‌ريك شعر طنز حمید آرش آزاد

روْمانتيك ايك، بيزه جؤور ائتسه نازلي يار، سئوه‌ريك

توتاندا، دوْوشانا تاي، قاچسا اوْل نيگار، سئوه‌‌ريك

بگنمه‌ريك گؤزه‌لين ساغ – سلامت اوْلسا گؤزو

باخاندا، تيرياكي‌لر تك اوْلا خمار، سئوه‌ريك

غريبه ملّت‌ايك، اوْغلان! شعورلا يوْخ ايشيميز

ناغيل‌لا شعره فقط وورغونوق، شعار سئوه‌ريك

دئسه خانيم بيزه: «جان!»، تئزجه مشتبه دوشه‌ريك

چغير- باغيرلا دئسه گونده: «زهرِمار!» سئوه‌ريك

حيات‌دا اوْلسا، بشر سانماريق هُنَر اهلين

اوْ گون كي جان وئريب، اوْلدو يئري مزار، سئوه‌ريك

بير علم اهليني گؤرسك، دؤنوب، دوْداق بوزه‌ريك

توْپ اهلينه ائله‌ييب بوْللو افتخار، سئوه‌ريك

اوره‌ك‌ده گيزله‌ ده‌ريك اهل- عيال محبّتيني

گؤره‌نده ياد بالاسين، لاپ‌دا آشكار سئوره‌ريك

سوپورگه‌چي اوْلا همشهري‌ميز، گيجيك لنه‌ريك

غريبه اوْلسا بيزيم شهره شهردار، سئوه‌ريك

چوْخ ادّعا ائده‌ريك، وورغونوق گؤزه‌ل مارالا

ولي يالان دئييريك، ائتمه‌يه شكار سئوه‌ريك

سوْنا حامام لارينا، آيدا اللي يوْل گئده‌ريك

ووجود دا بلكه اوْلا ذرّه‌جه بُخار، سئوه‌ريك

گئده‌نده دوكتوره، تئز نومره وئرسه، شك‌لنه‌ريك

بئش- آلتي آي ويزيته چكسه‌ك انتظار، سئوه‌ريك

نه معرفت؟ نه‌ محبّت؟ بولار تعارف دور

وئره‌رسه دوْست بيزه گونده شام- ناهار، سئوه‌ريك

سنين‌ده طنزلي شعرين، ياپيشدي «آرش» خان!

ولي، كتاب يئرينه پايلاسان «دوْلار» سئوه‌ريك