بَگنمه‌دي! شعر طنز حمید آرش آزاد

يوْخسول گؤروب اوْ يار منِ زاري، بَگنمه‌دي
مين گول دريب، آيلاقلادي، خاري بَگنمه‌دي
كؤنلوم ائوين خرابه قوْيوب بيرجه حمله‌ده
صبري تالانا وئردي، قراري بَگنمه‌دي
قاش- كيرپيك ايله سينه‌مي يوز يئردن اوْخلادي
سالدي آياقدان، اوْندا شكاري بَگنمه‌دي
لامپا چيراغي اوزلو چيخيب، قالخدي رف‌لره
قيرجاندي چيلچيراقلارا، شاري بَگنمه‌دي
بر چيمديك ات گليب جانينا، باخ افاده‌يه
كوْر بوببو شيشدي، چشمِ خماري بَگنمه‌دي
قيرت آت بئلينده چيخدي اؤزوندن كئچل گده
آهو باخيشلي، نازلي نيگاري بَگنمه‌دي
ائششك‌دن ائندي، بنزي مينيب، گلدي جؤولانا
طيّاره ايله گزدي، قاطاري بَگنمه‌دي
بير گون آتاردي بير قيرنا گوللـه، ايندي گل
گؤركي، فرانكي، ماركي، دوْلاري بَگنمه‌دي
قلب پول اؤزون بازاردا گؤروب، مشتبه دوشوب
ويترينده ايرمي دؤرد عياري بَگنمه‌دي
عؤمرونده اييده دادماييب، ايندي موْزو تيخان
نارگيلي دورتدو قارنينا، ناري بَگنمه‌دي
شيطان ساياق «منم» دئيه‌رك اوچدو گؤيلره
اوْ سرورِ براق سواري بَگنمه‌دي
پارتي گوجودي ايله چاتدي بؤيوك منصبه الي
اوْندان سوْرا بو خلقِ فكاري بَگنمه‌دي
بايقوش كيمي، فقط اولاماغي ائديب پئشه
قارغاني بَي قاييردي، هَزاري بَگنمه‌دي
بيرجه اؤزون چيخيب، هامي‌يا اؤلمك ايسته‌دي
هئچ بير اوغورلو شعري، شعاري بَگنمه‌دي
هئچ نانجيب كئفين گؤروم آللاه سازاتماسين
وقت اوْلدو سارماشيق‌دا چيناري بَگنمه‌دي

شعر ملمع قاچ چاي- قند آل! شعر طنز حمید آرش آزاد...