لاي – لاي... باياتيلار--- حمید آرش آزاد

لاي- لاي، اوشاغيم، لاي- لاي

گوللو بوداغيم، لاي- لاي

گئنه برقلر گئديب

سؤنوب چيراغيم، لاي- لاي!

*

جانين سُرورو، لاي- لاي

گوزلرين نورو، لاي- لاي

بيركيلو يوْغورت آلديم

سو تك، دوم- دورو، لاي- لاي

*

منه «جان» دئيهن، لاي- لاي

قورو سود يئيهن، لاي- لاي

گئدهسن مدرسهيه

وئرهم شهريهن، لاي- لاي

*

لاي- لاي چاللام، ياتارسان

قيزيل گوله باتارسان

دانشگاها گئدهنده

قاب- قازاني ساتارسان

*

قنددانيم قندي، لاي- لاي

جانيم كمندي، لاي- لاي

تزه ياماقلار سالديم

سوفرا رنگلندي، لاي- لاي

*

دريامدا باليق، لاي- لاي

قوْروسون خاليق، لاي- لاي

سنه هر زاد آلارام

قوْيسا باهاليق، لاي- لاي

*

ائوين گؤزهلي، لاي- لاي

سؤزو مزهلي، لاي- لاي

يوز ايلده داها دؤزسن

ايشلر دوزهلي، لاي- لاي