آتا گونو مناسبتينه كيشي‌سن، آنجاق‌كي...!؟ شعر طنز حمید آرش آزاد به مناسبت روز پدر

اوْلسا يوكسك مقامين، چوْخلودا ثروت، كيشي‌سن

   قسمت اوْلسا سنه عالم‌ده سعادت، كيشي‌سن

 آنا سؤيلركي: «اگر آروادي مجبور ائده‌سن

   ائله‌يه عؤمرو بوْيو من‌دن اطاعت، كيشي‌سن»

 باجي‌نين فكري بودوركي، سن ائوينده قاديني

   قوْياسان ايل‌لر ايله خوْش گونه حسرت، كيشي‌سن

 قادينين‌دا نظرينده، آناني، هم باجي‌ني

   ائتمه‌سن ائوده قوْناقليق‌لارا دعوت، كيشي‌سن

 اوْ دئيه‌ر: «آغزينا چال هم آنانين، هم باجي‌نين

   بولار ائتمه‌زسه بيزيم ايش‌ده دخالت، كيشي‌سن»

 باجاناق بير آرابا گؤردو، تئز ايستر سيويچي

   «پئژو» نو وئرسن اوْنا هرگون امانت، كيشي‌سن

 قارداشين ايستيري تئز- تئز اوْنا ضامن اوْلاسان

   ائله‌سن بوْرجلو دوشن گون‌ده ضمانت، كيشي‌سن

 قايين، عسكرليگي وئرميش باشا، ايش‌سيز دوْلانير

   سرمايا وئرسن، اوْدا ائتسه تجارت، كيشي‌سن

 قوْنشونون اوْغلو، سنين اوْغلونو هئي تاپدالايير

   دينمه‌ييب، گؤستره‌سن بوْللو نجابت، كيشي‌سن

 تعظيم ايستير رئيسين گون‌ده اوْتوز- قيرخ دفعه

   گون‌ده يوز يوْل ائده‌سن عرضِ ارادت، كيشي‌سن

 قصابين- باققالين البته توقع‌لري وار

   سوْرماسان‌كي: «نييه‌بس قالخيري قيمت؟» كيشي‌سن

 دوْستلارين لُطفو سنه چوْخ‌دور، ارادت‌لري وار

   شام- ناهاردا وئره‌سن ياغلي ضيافت، كيشي‌سن

 ايل‌ده بير سئچگي اوْلور، مين‌لر آدام كانديدا

   هامي‌سيندان ائله‌سن دوزگون حمايت، كيشي‌سن

 كيم «سلام» سؤيله‌دي، وار حقّي سنين بوْينوندا

   قوربان ائتسن اوْنا جان‌لا مالي راحت، كيشي‌سن

 كيشي گؤردوم سني «آرش»! جانينا آند ايچيره‌م

   سن اؤل ها...، چون‌كي وارين بوْللو حماقت، كيشي‌سن