اوْلماز، اوْلماز، اوْلماز! شعر حمید آرش آزاد

عقلين كتابا آزماسا، عؤمرون هَدَر اوْلماز,
هركيم‌كي باشين علمه قوْشوب، بخته‌ور اوْلماز

مين دوكتوران الده اوْلا، ميليون‌جا ليسانسين
بير اسكناسين قويروغوجا معتبر اوْلماز

آتسان قيراغا فلسفه‌ني، تاريخي، علمي
عؤمرون بوْيو كلّه‌ن‌ده قاليب، دردسر اوْلماز

استخدام اوْلور پوللويا، مين‌لرله سوادلي
علم اهلينه، هئچ پوللو جهان‌دا نؤكر اوْلماز

دلّال‌ليغي اؤيره‌نمه‌دي هركيم، ايشي ياش‌دير
سرو اوْلسا، صنوبرده، الينده ثمر اوْلماز

بؤركون گؤتور انسان‌لارين، هم باشلارا بؤرك قوْي
اوْندا گليرين آز، معاشين مختصر اوْلماز

دوزلوك نه‌دير، اوْغلان؟ نه صداقت؟ نه عدالت؟
اوْنلاركي گليب انسان اوچون سيم و زر اوْلماز

شعري، ادبي آت چؤله، فرهنگه قلم چك
چوْخ بوْش بئيين اوْلما، بئله زادلار هُنر اوْلماز

دستمال اله آل، ياغ‌دا گؤتور، بيغ‌لاري ياغلا
اوْندا تالاسان دونياني‌دا، هئچ خطر اوْلماز

خوْش داورانيشين اوْلسا، بگه‌نسه مقام اهلي
آرتار مقامين، هم اوره‌گينده كده‌ر اوْلماز

دوكتورده، مهندس‌ده اوْلارسان پولون اوْلسا
قوْرخما، باس- ها باس دونيادير، هئچ‌ كيم خبر اولماز

آنجاق بئله ايش‌لر توتاجاق سان‌كي جهان‌دا
عالم دئسين: «اوْغلان! بئله سورتوك بشر اوْلماز»!

«آرش»‌ده دوروب، تنقيد ائديرسه، اوْنو سايما
بير آزجا گؤنون اوْلسا قالين، كارگر اوْلماز