ياشاسين كانديدالار...! حمید آرش آزاد

هر نئچه كانديدا اوْلا، بنده حمايت ائيله‌رم

تك- تكينه گونده گئديب، عرضِ ارادت ائيله‌رم 

سحر، بئش- اوْن ستاد گزيب، آخشامي اللي‌سين- يوزون

گئجه بئش- آلتي يوز يئره گئديب، اقامت ائيله‌رم 

بوردا ستاد رئيسي‌يم، باشقا ستاددا چاي وئره‌ن

فرق ائله‌مز، هايان گله، دوْيونجا خدمت ائيله‌رم! 

اله آلاندا بير «قاوال»، چالاندا ياخشي «زورنا» يام

ساغ‌ايله ياخشي دوْست اوْلوب، سوْلا رفاقت ائيله‌رم 

چپيك چالاندا، وار اليم؛ دُعا گره‌كسه‌ده، ديليم

فيشقادا ايسته‌سز، چالام؛ دوروب، قيامت ائيله‌رم 

«اصلاح» اوْلا، «اصول» اوْلا، هم «طلب»‌ام، هم‌ده «گرا»

چون‌كي يئله اينانميشام، اوْندان اطاعت ائيله‌رم 

سئچگي گونو گله‌ن زمان، محلّه آغ ساققالي‌يام

بئش- آلتي حؤوزه‌ني گزيب، رأيه نظارت ائيله‌رم

نتيجه‌ني وئره‌ن زمان، كيم چيخا، يوْخ تفاوتي

بنده، تئز عرضِ تبريكي، همان اوْ ساعت ائيله‌رم 

بئش- اوْن غزئت‌ده تبريكيم، ائرته‌سي گون چاپ اوْلمالي

هم‌ده حضوري خدمته، چاتيب، زيارت ائله‌رم 

ايندي بو يوْل طلبكارام، چيخان داداش‌دا بوْرجلودور

سلام‌لارين سايين اوْنا، داها زيادت ائيله‌رم 

عرض ائده‌رم‌ كي: «سروريم! قُدرته عاشق دگيلم

اجازه وئرسه نيز، فقط خدمته همّت ائيله‌رم! 

بئش- آلتي جور مشاورت، اللي رقم معاونت

اوْندان علاوه، اوْن يئره، اؤزوم وزارت ائيله‌رم»! 

بوْللوجا وار زيرك‌ليگيم، هم ال- آياق، هم‌ده اوزوم

بو سرمايايلا، هر يئره گئده‌م، رياست ائيله‌رم 

ائده‌رسه «آرش» انتقاد، ساققالينا گوله- گوله

سؤزلريني تكذيب ائديب، اؤزون ملامت ائيله‌رم