برای حمید آرش

يئدي. ايله دؤندو مرحوم «حمید آرش آزاد» ین  بیز لردن آيريليب ابديته قاووشماسي ، لاکين بو آيريليق هئچوقت و هئچ زمان اونون آديني وياديني اورک لردن سیله بيلمه ييب و سیله ده بيلمز،

چونکو «آرش» اؤزل ياشاييشي ايله ، قالارغي اثرلري ايله او قدر اورک لرده وتوپلوم دا اوزونه يئر آچيب کی زمان اؤتدوکجه يادلاردان سيلينمه سی يوخ بلکه چوخراق تانينماسينا سبب اولوب و ائل لر آرا اثرلريله آدي دیل لرده و يادي اورک لرده ،شعرلري ايسه ائل لرايچينده ياشاماقدا اولاجاق، يئدي ایل يوخ بلکه يئدي یوز ایل دن  سونرادا آرش ین يازديغي اثرلر و قوشدوغو شعرلر دیل‌دن ديله ائل‌دن ائله ياييليب میرزا مؤجز شبستری و میرزا علی‌اکبر صابر کيمي آرش‌ین بونداندا آرتيق تانينماسينا سبب اولاجاقدير،

منجه آرش‌ین هونريدن وياراديجيليغيندان اوستون منييتي واؤزل ليگي وار ايدي کی قوجامان بير چينار آغاجي کيمي هر يئلين اؤنونده باش ايمه‌دن، سارسيلمادان، هر درده، عذابا داياناراق ياشاييب ياشاتماغا و ياتميشلاري غفلت يوخوسوندان اويانديرماغا چاليشيردي،

و بعضی قورخاق‌لار ويالتاق‌لار کيمي زمان يئل ايله اويناييب وگونده‌لیک ايچی بوش مووضولارلا اؤزونه شهرت قازانماق دونيا مالينا هر يولدان اولورسا ال تاپماق دئييلدي، آرش آزادليغا اورکدن وورغون واؤزگور یاشاما هر بيرزادان چوخ اؤنم وئرن و ايسته دیگی وسئوديگي کیمی چوخ ياشاما يوخ دوز ياشاما باغلي اولان بير اينسان اييدي،

 آرش مالی، دولتی و شهرتی و هرنوع مقامی گئچری، پوچ و يئرسيز ساناراق تکجه اينسان حق‌لرينی و تمام دونيادا اؤزگورلوغو عدالتی آرايان وآختاران و نهایت بوتون اینسان‌لارین خوشبخت‌ليغا چاتماغيني آرزو ائله‌ین بير اوستاد طناز شاعيرايدي، اويله کی اؤزو ابدی قالاجاق شعرينده دئيير،

مراميم اينسانين آزادليغي حريّتی دیر،

من اؤزوم تورپاغا گئتسم‌ده مراميم قلاجاق،

يولچودا يوخسادوام، یول داکي واردير، نه غمیم،

آرتاجاق يولچولار، البتهّ دواميم قالاجاق،

آرش ظولمون حق سيزليگين ريانين، يالانين و ساده اينسان‌لاری حیله و کلک‌له آتداتمانین نه قدر پیس و منفور اولدوغونو دريندن دوشونوب اينسانين بئش اون گونلوق دونيادا قوناق اولدوغونو آنلاييب اؤلوم دن چکينمه‌ین و قورخمايان تنقیدچی ايدي اؤزونون يوخ، ائل‌لرين قايغيسين چکن ايدي «اميربازاري اود توتسون منه بير دستمال اولسون» دئينلردن دئييلدي، آز ياشا، آزاد ياشا، انسان ياشا، رحمتليغين همیشه دیل ازبري ايدي، نجه کی، بنده کی گئتديم عنوانلي شعرينده دئيير:

فکر ائتمه دوشر ائل خطره، بنده کی گئتديم،

ياتوش گلر عقرب قمره، بنده کی گئتديم،

هم شعرايله هم نثرايله، من طنز يازارديم،

گئتمز بو اثرلر هدره بنده کی گئتديم،

آرش دوغرودان دوغروسونا بونا واقف ايدي کی اصيل اؤلوم اينسانا او زمان دیر کی حیوان ساياق باش آشاغي ساليب، یه ييب ايچمک‌له نئچه ایل دونيادا ياشاييب سونرادا اؤزوندن بير دوزگون اثر بيراخمادان وياشاييشین نه اولدوغون بيلمه دن هر بير زاد دان ال اوزوب تورپاغا جومولا،

اوآج گؤزلولري و دونياني يئه‌ييب دويمايانلاري طنز قلم ايله بيزله يرک کؤنول آدلي شعرينده دئيير،

دونيانين نعمت‌لرين، هرزادکي وار، ايستر کؤنول،

اللي تن «يورو»، اوتوزخاروار دولار ايستر کؤنول،

چون قناعت اهلی دیر، حقّيندن آرتيق ايسته مز،

دونيادا، بيرده بهشت ده هر نه وار، ايستر کؤنول،

يئري جنت، روحو شاد اولسون، اسفهلانی

حسن حسن‌پور (دوزه قول)

آرش بيليريک بيزلره‌ده بويله سفر وار،

دیل آچ دئه گؤرک سونکی جهاندا نه خبر وار،

هم حوری دئييرلر همی دوزخ همی يانماق،

دئه کیم لره حوری، کيمه ايشکنجه شرر،وار؟

هانسي يولو گئدسک اولاريق رستگار آنجاق،

سن ده بيليريک هرايشه چون چشم بصر وار،

جنّت‌ده دئييرلر دايانيب حوري، الینده،

بوشقاب دولوسو میوه‌لری عین شکر وار،

يئه میوه‌لرين اؤپ ياناغين، ديشله دوداغين،

خلّآق جهاندا گؤزليم گؤر نه هنر وار،

بيرده دئه ييلير خازن دوزخ دئوه اوخشار،

بير الده توتوب اود، او بیری الده تبر وار،

بعضی‌ده دئير يوخ بئله زاد جومله يالاندير،

بو باره‌ده اينسانلار آرا نئچه نظر وار،

جنت اورادير صلح و صفا حکم ائدير آنجاق،

دوزخ‌ده او يئر دیر کی یالان، فتنه و شر وار،

انصاف‌دی عدالت‌دی صداقت‌دی مروت،

جنت‌ده بو اعمالی ياپانلاردان اثر وار،

آرش ديله گلدي بو سؤزون وئردي جوابين،

بوردا دئدي ظاليم‌لر اوچون خوف و خطر وار،

ظولم ائيله‌مه اینسان حقوقون ائيله رعایت،

گلسن (دوزه قول) بوردا گؤررسن کی نه‌لر وار.